منية بن سبتي قررت باش نجرب نعمل الملسوقة الدياري قبل ما يبدا رمضان لقيت روسات و ما بقالي كان نجربها! الحق الكعبة لولة كانت فاشلة لكن مبعد استصينت و عرفت السر و خرجت في اللخر بطزينة ملسوقة! حاجتكم بالمواد هاذم : -250 غرام فرينة -40 دسل ماء -3 مغارف كبار سميد أرطب -و شوية ملح 1 تنجمو تخلطو المواد الكل بالخلاط كيما تنجمو تخلطوهم بالركاض اليدوي المهم في اللخر يلزم تتحصلو على خليط ما غير كعابر و متجانس 2 في الأثناء خليو المقلى تسخن 3 بعيد على النار و بفوشة غطيو المساحة المدورة الكل متاع المقلى أما ما تحطوش برشا باش تقد الورقة رقيقة و هاك علاش نستعملو الفوشة 4 رجعوا المقلى على النار و استناو حتى الورقة تتنحى وحدها على الأجناب وقتها كملو نحيوها بالشوية أنا ورقات الملسوقة عديت عليهم شوية زيت باش ما يلسقوش و غطيتهم بمنديل ما نجمتش نستنى و جربت وريقات الملسوقة متاعي، عطاوني بريك بنين…
