أكبر حب تنجم تقدمو أم لصغارها حب مخلط بالدموع

درة الطرابلسي

أكبر حب تنجم تقدمو أم لصغارها حب مخلط بالدموع

اليوم باش نكتب على هاك الهجالة إلي مات راجلها و خللها كمشة صغار و هي عز شبابها و كبكبت عليهم و رباتهم و نسات المرا إلي فيها

باش نكتب على الأم إلي كرامتها مرمدة بالطرايح و العياط و السبان و هي صابرة ما تحبش تتطلق خاطر صغارها تخاف تظلمهم

باش نكتب على الأم إلي تعرفو يخون فيها تعرفو نذل تحب تتطلق أما تخمم قبل في صغارها و أول ما تبدا تسأل في المحامي تقلو : قلي قبل كل شي صغاري كيفاش؟؟

باش نكتب على الأم إلي تنحي اللقمة من فمها و تعطيها لصغيرها

باش نكتب على الأم إلي تبيع ذهبها باش تشري حاسوب يقرا بيه ولدها الكبير

باش نكتب على الأم إلي متثقفة و قارية 4 سنين في الجامعة و تمشي تخدم في الديار على خاطر تشري لمجة و ماكلة و لبسة لصغارها و خدمة النهار ما فيها عار

باش نكتب على الأم إلي تخدم تنظف الشوارع تحت الشمس خاطر العلة إلي واخذته فلوسه يصرف فيها على المحنة متاعه و صغارها يلزمهم ياكلو و يقراو
باش نكتب على الأم إلي تخدم و تروح تقري و تنظف و تطيب و تغسل و ترقد هي آخر وحدة و تقوم أول وحدة

See Also
Jardinage, enfant, printemps

باش نكتب على الأم إلي الحبالة فسدتلها بدنها و خلاتلها على الأقل أمارة

باش نكتب على الأم إلي شهريتها تتصرف من الجمعة اللولة و هي ما ينولها منها حتى مليم
باش نكتب على الأم إلي بعد ما كبرت و تعبت تربي ولاد ولادها خاطر الكبدة تولد و تعاود
أعملو نظرة في معارفكم تو تلقاو على الأقل أم من الليستة إلي كتبتها تعرفوها هذا كان موش أكثر

معظم الأمهات نهارة إلي تولي أم تقتل المرا إلي فيها و تنسى روحها

تحية إكبار لكل أم.

What's Your Reaction?
Excited
0
Happy
0
In Love
0
Not Sure
0
Silly
0
View Comments (0)

Leave a Reply

Your email address will not be published.

© 2019 BINETNA. All Rights Reserved.

Scroll To Top