Now Reading
نصائح مهمة للمرضع و الحامل الي قرروا يصيموا

نصائح مهمة للمرضع و الحامل الي قرروا يصيموا

كانك ترضع و إلا حامل و تنجم تصيم النشرية هاذي ليك و مهمة برشا.

قبل كل شي يلزم الحبلة و المرضعة يعرفو إلي ربي حللهم في رخصة عدم الصيام كان الصيام فيه خطر على حياتها و إلا حياة صغيرها و بالطبع يلزم الرجوع للطبيب المباشر ليها باس تاخو رايه قبل ما تقرر إنها تصيم.

في حالة إنو كل شي لاباس و إن شاء الله ديما لاباس هاذم نصائح هامة باش الصيام يتعدا في أحسن الأحوال :

شرب برشا سوائل : ماء خاصة، منقوعات (تيزانا)، حليب، عصائر فرشكة و من المستحسن إنها تبعد على العصائر المعلبة و المشروبات الغازية و القهوة و التاي و هذا حتى موش في رمضان راهو

تقسم شقان الفطر على مرتين :

-الوجبة اللولة خفيفة :

كعيبات التمر مهمين خاطر التمرة تطلع فيسع مقدار السكر في البدن و غنية بالألياف و تعطي برشا طاقة، سوائل، شربة، شوية سلاطة و شوية خبز و من المستحسن يكون خبز كامل و إلا خبز بالحبوب و موس الخبز الأبيض العادي.
-الوجبة الثانية في وفت السهرية :
من المستحسن إنها تكون متكونة من بقول ( لوبيا خضرا مثلا، جلبانة…) البروتينات (اللحم الأحمر و الأبيض و الأسماك) سلايط و غلة.. الوجبة هاذي البدن موش باس يستعملها بالوقت و باش يخزنها و هذاك علاش ما بلزمهاس تكون دسمة برشا باش تنجمو تخليو بلاصة للسحور خاصة إلي الليل في الصيف قصير.

السحور :

مهم برشا و ما يلزم الحامل و المرضع تفلته على خاطر هو إلي باش يعاونها تثبر في النهار و يحميها من نشف الماء و النقص في كمية السكر و من المستحسن يكون متكون من بروتينات, مشتقات الحليب، غلة، سوائل و خاصة الماء و ما تنساوش السكريات إلي هضمها يكون على مدى طويل les sucres lents نلقاوهم مثلا في البطاطا الحبوب…

See Also

بصفة عامة :

-نوعوا الماكلة و ابعدوا على السكاكر إلي تعطش أكثر و محفز كبير للسمنة
-أعطيو قيمة كبيرة للبروتينات و الدهنيات الغير مشبعة إلي نلقاوها في الأسماك و الفاكية… و الحديد إلي نلقاوه في اللحوم الحمراء و البقول…
ما نستحقوش نوصيو على تجنب السخانة
-تجنبو انكم تقوموا برياضة أو أنشطة تطلب مجهود و تعطش و هذا موش في رمضان أكهو
-ما تشربوش برشا الماء فرد ضربة خاطر البدن ما يستنفعش بيه و حاولو تفرقو الكمية المطلوبة (على الأقل 2 لتر) على مدة الإفطار الكل إلي تدوم بين المغرب و الفجر أما حطو في بالك إلي الدخول و الخروج على بيت الراحة باش يكثر أكثر من قبل (الحبالة أصلا قايمة بالواجب)
-حاولوا تلقاو وقيت للقيلولة نعرفو موش ساهل مع الخدمة و الدار و الكوجينا لكن ربع ساعة على الأقل مهمة برشا.

ردوا بالكم!
أقل علامة متاع نشف ماء ( احساس بعطش كبيير، بولة غامقة ياااسر و ريحتها قوية…) احساس بالغثيان (غرض الرداد)، تعب كبير، وجيعة راس قوية برشا، دوخة يلزم تفطر بالوقت و إنت طبيبة نفسك!
ما تنساوش باش تعسو على ميزانكم و حركات الصغير هذا بالطبيعة بالنسبة للحبلة

إن شاء الله تصوموا بصحة البدن و ربي يتقبل منكم صالح الأعمال!

What's Your Reaction?
Excited
0
Happy
0
In Love
0
Not Sure
0
Silly
0
View Comments (0)

Leave a Reply

Your email address will not be published.

© 2019 BINETNA. All Rights Reserved.

Scroll To Top