النصائح المهمة باش تحافظو على صغاركم في الصيف
الصيف جا و جاب معاه السخانة و الشميسة و إلي يقول شمس يقول نشف ماء، حروق من الدرجة الاولى، حالات تسمم.. الصغيرات هوما المتضررين الرئيسيين هاك علاش يلزم ردو بالنا عليهم!
هاذم بعض النصائح باش يتعدا صيف مرتاح :
عمركم ما تخليو صغير في الكرهبة وحدو حتى و كان لبضع الدقائق و في الظل الحكاية تظهر ساهلة لكن تنجم تسبب في حالة سخانة كبيرة و توصل حتى لفقدان الوعي!
ديما راس الصغير مغطي : مظلة فولارة صغيرة محرمة أي حاجة المهم ما تخليوش راس الصغير معري و كانكم في الشط ديما الشعر يلزمه مبلول و وين يشيح تعاودو تبلو الشعر مرة اخرى
استعملوا واقي من الشمس و لبسو الدبش. يلزمكم تعرفو الي الدبش المبلول ما يحميش من الاشعة الفوق ينفسجية
إلي تتسمى ضربة شمس هي في الحقيقة حروق من الدرجة الأولى تمس الكبدة الفوقانية و ساعات تكون مخطرة قد ما تكون الحروق على بلاصة كبيرة قد ما تكون أخطر..
ضربة الشمس تنجم تولي سخانة الي هي علامة خطر خاصة بالنسبة للصغار و المسنين و تنجم توصل للنشح الماء الله لا يقدر!
ما تنساوش عويناتهم إلي يلزمهم مريات شمس باهية موش اي نوع متاع بلار
شريبة الماء في كل وقت يلزمها حاظرة
ردو بالكم من بعض الماكلات إلي فيسع تخن في السخانة و تنجم تتسبب في تسمم كيما الدلاع و المايوناز و غلال البحر
كان تنجمو حاولو ما تخرجوش الصغيرات في السوايع الأكثر سخانة ما بين الساعة 11 متاع الصباح و الأربعة متاع العشية
