هدية لامي في عيد الأمهات


مجراتش العادة أني نهدي لامي هدية في عيد الأمهات
و ساعات ننسى جملة إلي فما عيد إلا ما يفكروني صغاري بهدية من يديهم نولي أنا نهز التليفون و نكلم أمي
العيد هذا سبيسيال، أو مكانش باش يكون لو كان موش اليوم 25 ماي 2022 هزيت امي الطبيب بعد مديدة من التخمام في الحالة الصحية اللي وصلتلها.. الفيزيت مخذاتش برشا وقت باش التشخيص و ضاح
الطبيب: مدام تفضل باش يوزنك الفرملي
امي خرجت و هوا تلفتلي قلي بنتي عندي خبر موش باهي
قلبي ضرب و دموعي صبت و عينيا ضلامو و و ذنيا صدعو
قلي كاينك فاهمة؟ قتلو اي أما منيش حابة نصدق… قلي مالا بنتي لازمك تقوي روحك و تصدق و لازمك تحضر روحك و تتوكل على ربي
وبديت نصرصت في الاسئلة ورا بعضهم…و هوا يفسرلي و أنا دموعي تشرشر…ياربي امي اللي كنت نشدها من حوايجها في الليل و أنا صغيرة باش في الصباح متمشيش و تخليني..باش نولي أنا منخليهاش…امي اللي تحكيلي حاجات على صغرها باش نولي أنا نفكرها في صغري…امي اللي كانت تقريني باش نولي أنا نعلمها و نوريها… المرض هذا يقول يجي للناس اللي تعبت و تعبتها الدنيا..يعني أنا نجم نكون سبب خاتر تعبت عليا و هزيتتي أنا و اختي بسنيها كيف القطوسة و لا كلت و لا ملت …
حسيت الطبيب يحب يقلي اللي المرحلة متقدمة شوية …حب يبردني و استشهدلي باية قرءانية قال تعالى في سورة النحل: » ومنكم من يرد الى ارذل العمر »
ايييييه يا امي وجيعة كبيرة لكن أنا صبورة و ربي سبحانه اختبرني و مزال يختبرني و منجم كان نحمده و نشكره

امي نحبك و إن شاء الله تكون أرضية عليا و كيفما أنت ضحيت علينا و مخليتناش…أنا منخليكش و بقدرة ربي ازمة و تفوت.

What's Your Reaction?
Excited
0
Happy
0
In Love
0
Not Sure
0
Silly
0
View Comments (0)

Leave a Reply

Your email address will not be published.

© 2019 BINETNA. All Rights Reserved.

Scroll To Top