أمي نحب نعرف كيفاش جيت للدنيا

ايناس الجنفاوي

من بين مهام المتعددة و العديدة متاع الأم إنها تجاوب على السؤلات متاع صغيره و إلي في بعض الأحيان تكون عجيبة و غريبة و ساعات تكون محرجة..
ولدي الكبير كي كان عمره أربعة سنين سألني السؤال إياه : ماما أنا كيفاه جيت؟؟

كان عندي برشا إجابات في مخي نجم نستعملهم : لقيتك في وردة، بعثوك ليا في كيلو بوسطة، رقدت و قمت لقيتك بحذايا (تصورو للحظة إنها الحكاية تنجم تكون بالحق… كارثة هههه) و إلا نقلو الجملة الشهيرة إلي أكيد سمعناها نهار من خواتنا الحنان : لقيناك قدام باب جامع خخخخ

أنا اخترت باش نجاوب بطريقة علمية على قد مخه.
جبت كتاب متاع جسم الإنسان للصغار و حطيتو في حجري و بديت نحكيله :
حبيبي إنت جيت بعد حب جمع « بابا صغرون » إلي اسمه : حيوان منوي و « ماما صغرونة » إلي اسمها بويضة.

الحيوان المنوي عندو راس و ذيل و هو سريييع و نشيييط
كيفي أنا ماما كيفي أ!!
إي و الله يا وليدي قلت الحق

البويضة كيمة العظيمة أما صغروووونة و تتحرك بالشويية و تقعد تستنى حتى يجيها الحيوان المنوي
يااا مامااا هاذي كيما البنات
بالضبط يا عزيزي

الحيوان المنوي و البويضة يعملو تعنيقة كبييييرة و وقتها تبدا حياة البيبي كيما بدات حياتك إنت و يبدا يكبر بالشوية بالشوية.
سكت و خمم خمم و سألني السؤال إلي كنت خايفة من من أول ما بديت نفسرلو :
ماما هو بابا كيفاش عطاك « بابا الصغير » ؟؟ في مغرفة؟؟
نعترف إلي أنا تبهذلت بحكاية المغرفة و شدني كريز ضحك لكن في قرارة نفسي كنت فرحانة بتسلسل الأفكار عنده و جاوبتو اي بالضبط يا وليدي مغرفة قبل الأكل و مغرفة بعد الأكل هههههه
و مبعد قتلو السؤال هذا ما نجمش نجاوبك عليه تو إن شاء الله كي تكبر شوية أخرى تو وحدك تعرف الإجابة.
ولدي ماتغشش بالعكس فرح عللخر خاطر غذيتله الفضول متاعه و عرف إلي فما أسئلة الاجابة متاعها ما ناخذوهاش بالوقت.

تو المعلمين متاعه يعيطوله « العالم الصغير الفضولي »

أعطيو الثقة في صغاركم و كي يسألوكم جاوبوهم و خوذو بخاطرهم وردو بالكم تعطيو إجابة متاع تتليف خاطر الصغير ما ينساش و أي معلومة ياخوها باش تقعد اتبعو.

الكتاب تابع مجموعة كتب علمية و وسائل تعليمية حديثة مشرية من معرض الكتاب بما يقارب 600د و فما امكانية تخلص بالشوية

المجموعة اسمها : piccolia