هي في دارها وجاها استدعاء عرس راجلها
هناني
مرا معرسة ، عندها صغار ، راجلها خذا مرا اخرى ، الكاتبة متاعو ، معناه السيد متعلم ولابأس عليه.
الراجل مشى خطب الكاتبة ، وعائلتها وافقت
سمعت مرتو هبلت ، مشات لبو الكاتبة وقالتلو راهو خطيب بنتو هو راجلها ومازالت معرسة به.
جاوبها الاب : عاد اشبيه ، انا خذيت زوز نساء وكانوا عايشين مع بعضهم في دار وحدة لاباس عليهم.
المرا مسكينة ما نجمت تعمل شيء .. والراجل قاللها تقبل الحكاية والا تمشي تطلب الطلاق
مشات شكات به لمركز الشرطة ، قالتلهم راهو راجلي يخون فيا مع كاتبته وخاطبها باش يعرّس بها.
الشرطة عملت روحها ما سمعت شيء وباش اتلّفها طلبت منها دليل الخيانة
نهار من النهارات جاء في يدها استدعاء عرس راجلها، رجعت لمركز الشرطة، عطاتهم الاستدعاء كدليل على خيانة راجلها ومخالفتو للقانون
الشرطة ماتنجمش اتشدو ، لان يلزم إذن من الحاكم.. والاستدعاء ماهوش دليل قاطع
يلزم يستناو حتى يشوفوه متصدّر مع عروستو ، وقتها يشدّوه متلبّس
جات ليلة العرس وحضرت العوادة والمستدعين والاهل ، وتصدر العروس مع عروستو .. قريب توفى الحفلة زدمت الشرطة
لا ، لا ، العروس والعروسة ما باتوش في الحبس ، لان الشرطة خافت تدخّل ، يقوموا اهل العرايس يعملوا ردة فعل وتصير مشاكل
عاينوا الحالة، رجعوا لمركزهم ، ومن غدوة بعد ماتهنى العروس بعروستو ، جاو هزّوه وعدا ثلاثة شهر حبس
إتدخلت انا وقلت للمرا الّي تحكي في الحكاية ولّي هي تخدم في الامن ، معناه الحكاية تعدّات على يديها : بالطبيعة السنين هاذم ،كل شيء دخل بعضو
جاوبتني : الحالة هذه صارت في عام 2009 , والراجل والمرا قافزين اكثر مني ومنك ، ولا واحد في عائلاتهم من هاك الجماعة
انا: مالا هذا هو القانون الموجود؟
قالتلي: هذا هو القانون آش يقول، يلزم حالة تلبّس
أنا توة فهمت علاش يجيوا لسي عناء (علاء) ويصرحوا انهم عايشين مع نساء غير نساهم وجايبين صغار في الحرام ، والحاكم ما يشدهمشلانو ما شدهمش بالكمشة وهوما متصدرين
What's Your Reaction?
Excited
0
Happy
0
In Love
0
Not Sure
0
Silly
0
