يوميات نافسة
إيناس العطوشي
ورَرَرَي، ورَرَرَي، ما أحلاها ماأحلاها..ربي يفضلها….أيّا فرحة عازب!
تره خلينا نشوفوها، هات نبوسها..اممممه. ما أحلى خديداتها هات بوسة مرصوصة..
حاسة روحك شفتو المسلسل هاذا قبل؟
:ما فماش نافسة في تونس ما راتش حلقة وإلا أكثر من مسلسل النفاس
الحلقة الأولى: في السبيطار
« والله جينا نطلو وبره ».. (ساعة..اثنين…ثلاثة…) شربوا التاي والقهوة وكلاو الحلو وفطور النافسة اللي ما عينهاش وسألوها « طلقت الريح وإلا مازلت؟ » وكل وحدة فيهم حكاتلها قصة ولاداتها الأربعة (وهوما الصغيرة فيهم عمرها خمسين سنا).. »ميسالش رضّعوا ماناش براينية..أما رد بالك ترضّع قدام الناس ياخذوك بالعين.. ».. (تو نرضّع قدام الناس وإلا لا؟ وأنتم ناس وإلا جنون؟)
الحلقة الثانية: اللي تجي تهني وتجيب مفرختها الجنون معاها
« والله فرحنالك ». (لولدها العفريت) « إيجا شوف البيبي ماأحلاه..بوسو بوسو ما تخافش » (شكون اللي يخاف؟ البيبي المسكين وأمو وإلا فرخ الجنون). « إيجا نمسحلك خشمك يجري » (النافسة داخت. خشمو اللي يجري مازال كيف مسحو في ولدها المسكين)…والله فرحنالك!
الحلقة الثالثة: جينا على غفلة
« الله غالب تو فضينا. تو سمعنا قلنا نجيو نفرحولك. انت هكّا هكّا نافسة لا عندك ما تعمل ولاعندك وين تمشي.. قلنا لواه نكلموك. نعملوهالك مفاجأة. أحلى! »
الحلقة الرابعة: هات نبوسو
« يا غنوشو يا غنوشو. شوف ما اأحلى زينو. يضحِك! والله ضحكلي. هات نبوسك ما أحلى زينك. أتشوم! أنا كايني بديت نستبرد. قداش خفيف ما أحلاه. ماأحلى ريحتهم البيبيات كيف يتولدو. خليه عندي شوية! شوف ما بكاش يضحكلي ما أحلى زينو.
الحلقة الخامسة: ووه ديما راقد
« يا وخيتي هاذي المرة الخامسة اللي نجي ونلقاه راقد! لا ما يهمنيش باش نفيقو هات هنا! خليني نلعببه شوية وتو يرجع يرقد ميسالش. الصغار فيسع يرجعو يرقدو ما تخافش! »
الحلقة السادسة: قلي قوم روّح
« ووه فيسع طاح الليل، قولولي قوم روّح. ما أحلاها قعيدة. إيه شفت عندنا قداش ما تلميناش. على خاطرك باش نزيد شوية برك. » شربت تايها وقهوتها وكلات الزريز والحلوى وتعشات وعاودت تاي آخر وبدا الكوفر فو ياخي قعدت باتت!
الحلقة السابعة: وخيتي الله غالب تو فضيت
« والله خليت العشا على النار وقلتلهم دبرو روسكم أنا ماشية نهني. قلت نخطف روحي نصيّف ساعة. » (بعد العشرة) « حاسة بيك بديت تنعس ». النافسة (حاشمة): لا لا زيد شوية ما احلاها قعيّدة. « والله على خاطرك هاني باش نزيد شوية ».
الحلقة الثامنة: ما فما شي من قيمتك
« والله حاشمة منك. ما فما شي من قيمتك. الحقيقة أنا جابوهولي لبنتي (اللي تو عمرها 20 سنا) أما ما خرجش من باكوه! قلت نودك بيه. ما تحقروش، والله من ألمانيا جابتهولي سلفة مرة خو جارتي متاع الدار القديمة. خدوجة عرفتها؟ »
الحلقة التاسعة: خوذ كلام اللي يبكيك
« اسمعني عزيزتي، أنتم جيل الفايسبوك وغوغل يمشي في بالكم تعرفو كل شي، أما ما تحقروش ناس بكري. راهم ما خلاو شي ما قالوهش. تمشيش ما تحلّقهاش؟ راهي تطلعلك حولة! رد بالك ما تعطيهاش طريّف عسل وبسيسة. ارفسلها طريّف لوز في الحليب وسوّكلها لغبها باش يطلعو سنيها بيض. لا يلزمك تقمطها حتى لين تولي واقفة كي الحطبة، باهي لظهرها. وخليها تبكي باش حلقها يتسرّح. »
الحلقة العاشرة: ما تسمع كلام حد، أنا نعطيك الصحيح
« اسمع يكذب عليك اللي يقلك، ما دامك ترضّع ما تحبلش! أنا نقلك راني جايبة خمسة! ما تسمعش كلامو الطبيب هاذاكا بالعاني باش ياخذ منك فازيته زايدة. »
الحلقة الحادية عشر: رد بالك من قطوس النفاس
« شوف، ما تقولش نتدخل في أمورك وإلا حاجة، أما كان تقعد وحدك تو يجيك قطوس النفاس! شوف يلزم ديما دايرين بيك الناس حتى للأربعين على الأقل، والرّجِل ماشية جاية عليك ماكونش قطوس النفاس يبرك عليك. بنيتي أنا قلتلك وانت دليلك ملك، ما تقولش نتّدخل في أمورك وإلا حاجة! على كيفك! »
الحلقة الثانية عشر: والله حاشمة منك
« شوف أنا باش نهز كاسي معايا. منصور يموت على الزرير. لا لا ميسالش ما تعطينيش كاس آخر، أتو نهزّلو كاسي. ووه حشمتني. إمالا هات زوز كيسان أخرين للبنات، حتى هوما يحبو الزرير. »
الحلقة الثالثة عشر: يا وخيتي قداش وليتو كل شي تبَدّعو فيه
« أحنا بكري كنا نمدوه في صحفة الدراجي. تو ولاو حوانت وشي يهبل وفين تمشي تلقا موديلات جديدة أموضة. ما احلاه الدبدوب. والله يصلح بورتكلي. أما من وراني راهو تكلّف عليكم! ميسالش تي ماو أول صغير وما زلتو نافحين. أنا وخيتي باش نهز خمسة باش البنات ما يتغششوش. »
الحلقة الرابعة عشر: ما تحشمش
« ووه وخيتي حاشمة منا؟ تي أش عندك ما تخبي ماو اللي عندك عنا –هاهاهاها- اجبد بزولتك ورضّع ولدك على راحتك. هات هات نوريك كيفاش تشدها باش ما تهربلوش. تي هات نوريك. »
الحلقة الخامسة عشر: عليك بالحلبة
« اسمعني وطفيه الطبيب آش يفهم فيه هو. عليك بالحلبة. سفّها كيف ما هي نَية على الخوا أتو يولي الحليب يشرشر. وانزل على الكسكسي والمقرونة. واتعشّى مليح. رد بالك توقف الخبز وإلا المرق. واشرب القازوز قد ما تنجم باش يمشيلو الحليب حلو.
والمسلسل ما يوفاش مع: بنيتي شبيه ضعيف يسخّف؟ ووه وجهك أصفر قارصة! تخرج؟ وين تمشي؟ يلزمك شهرين في الفرش! بكلّو بوه أخزر خشمو ووذنيه! ووه قداش بكاي، مشوم كيف بوه! اسمع يدو في يدو خوه جيب اللي بعدو هكاكا تربيهم مع بعضهم وترتاح!
What's Your Reaction?
