هذا كيفاش نظف خشم ولادي بطريقة سحرية و فعالة
المعروف إنو مدام الخشم نظيف مدام احتمال المرض يقل بالباهي.
طريقتي سحرية، فعالة و رخيييصة!!! طريقتي خذيتها من طبيبتي متاع أنف و حنجرة و طبيب ولادي باركها!!!
شنوة لازمك : صحفة صغرونة، شوية ماء دافي، شوية ملح خشين و زريقة ماغير الابرة أكيد.
كيفاش؟؟
في صحيفة صغيرة تذوب شوية ملح في ماء دافي ( الماء الدافي محبوب أكثر و ما يقلقش)
في الحقيقة الكمية هي ما يقارب 9غرامات على لتر ماء باش هكة نوصلو لتركيز 9٪ متاع الفيزيول إلي نشريوه من الصيدلية.
ما تستحقش تخلط لتر كامل خاطر مستحيل تستعملو فرد مرة و أحنا حاشتنا بالماء دافي كل مرة و اللتر حتى كان خلطتو دافي باش يبرد كي يقعد.
تنجم تثبت في درجة الملوحية كي تذوق تلقاه مالح كيما ملوحية ماء البحر ( مبعد بالتجربة تولي تعرف قداش تزيد بين صوابعك لنفس كمية الماء)
الصغير يكون قاعد.
تعبي الزريقة (5مل أو 10 مل) بالماء المالح و تفرغ في فتحة متاع الخشم فرد ضربة الماء و الوسخ باش يخرج من المنخر لاخر
تعاود حتى لين تشوف إنو الماء إلي قاعد يخرج نظيف تبدل المنخر و كيف كيف حتى ينظاف الخشم.
تنجمو تخليو الصغير راقد على جنب و تفرغو الماء المالح في المنخر الفوقاني و هكة الماء يخرج من المنخر لاخر.
الطريقة هذي رائعة خاطر الخشم ينظاف بالباهي و الصغير يولي يكح كحة قوية و فعالة تنظف الرواري من البلغم.
ولدي الكبير يحب الطريقة هاذي خاطر في الحقيقة الماء يدغدغ (أنا بيدي نستعملها باش نظف خشمي) أما ولادي الصغار يتقلقو شوية.
الطريقة هذي حل ما يتكلفش برشا :
كيلو الملح يسوى أقل من 300 مليم (في كل مرة مانستعملوش أكثر من غرام واحد)
الزريقة تتكلف أقل من دينار واحد و تنجم تستعملها برشا مرات مدام بعد ما تستعملها تحطها مسكرة في بلاصة نظيفة.
نجمو نستعملو ماء السبالة عادي.
الطريقة هذي صديقة الطبيعة:
بأنقص استعمال للبلاستيك الصغير متاع الفيزيول و نستعملو حاجات طبيعية كيما الملح و ماء السبالة.
: Version en français
Méthode magique pour nettoyer le nez de bout de chou
