الرضاعة.. اهو الصحيح و اهو الغالط
درة طرابلسي
وريريريري مبروك من انزادلك!
أغلب الأمهات أول ما يحطولها صغيرها في يدها في حركة لا شعورية تحاول إنها ترضعو يدورو بيها الأم و الحماة و الخالة و العمة و الأخت و اللوزة و الصحاب و إلي يجي يهني الكل القريب و البعيد هذا كان موش الحمو زادة يعطي رايو في الرضاعة و شنوة يلزم تاكل الأم و شنوة يلزمها تعمل.
من منطلق تجربتي لرضاعة توامة تعلمت برشا حاجات و اكتشفت إلي برشا أفكار و « مسلمات » غالطة و مغلوطة. و هاني باش نعطيكم الصحيح من الغالط
الحقيقة اللولة : تغصوير كرش الصغير و الغاز مربوط بماكلتك
غالط!
الدليل : في الأول هذاك آش خممت أنا زادة و تبعت الحمية إلي لزموها عليها مثلا ما ناكلش الدبابش (الجلبانة الفول اللوبيا…) رغم ذلك الطفل كان يعديلي ليلة زرقاء و الطفلة لاباس عليها وقتها اقتنعت إلي ماكلتي ما عندها حتى دخل و رجعت ناكل عادي و شي ما تبدل ولدي يشيخني بالبكاء و التغصوير و بنتي في الأثناء تفشخ في النوم.
الحقيقة الثانية : يا لطيف حليبك ضعيف هاك علاش صغيرك موش قاعد يرقد جيعان مسكين!
غالط!
الدليل : التوامة تولدو قبل وقتهم ياخي قعدو مديدة في الحضانة ( الكوڥوز) عاد من اللول كنت نجبد الحليب و نعطيهم و استانسو و قعدو حتى بعد ما خرجو مدة يرضعو بالبيبرو حتى لين رجعو يرضعو من عندي. كنت نجبد و نخلط الكمية الكل و نعطي فرد نوعية و فرد كمية للزوز الطفل اسم الله عليه يكمل و الطفلة لا. الطفل النمو متاعه كان خير و رغم ذلك كان يرقد أقل من الطفلة و مراجة أكثر. هذا ما خلاني نقتنع إلي المشكلة موش في الحليب المشكلة في الكمية و الجهاز الهضمي متاع كل صغير.
الحقيقة الثالثة : قوت روحك يا بنتي كوووول كول باش يجيك الحليب
غالط!
الدليل : في الحبالة ما نتسماش سمنت برشا رغملي كنت حبلة بتوامة لكن بعد الولادة الشهرين لولالين زدت 10كغ فرد ضربة!! الجماعة كان يرصو فيا، شبيك راني نرضع في زوز إلي يقلك!! و أنا زادة ما كنتش من العاكسين إلي كان يجي قدامي ناكلو و خذيت راحتي. وقتلي تجبد الحليب على طول النهار تعمل فكرة على كمية الحليب و نوعيتو ( الحليب يتبدل لونه و التركيبة متاعه على طول النهار) و اكتشفت إلي الأيامات إلي تسيبت فيهم على الماكلة بكل تفاني تقريبا شي ما تبدل!!
الماكلة تنجم تكون سبيل باش تتفرهد نفسانيا و تحارب الكساد النفسي إلي يمس الأم بعد الولادة و المعروف بالبيبي بلوز baby blues, تنجم تكون طريقة باش تبدل لبستك و تتعدا من طاي لطاي أكبر بالطبع، أما أكيد موش باش تزيد في كمية الحليب!!!
الحقيقة الرابعة : كي تشرب أكثر ماء و سوائل نافعة و منقوعات (تيزانة) تزيد في الحليب
صحيح!!
الدليل : الأيامات إلي كنت نشرب فيهم أكثر ماء و إلي كنت نعمل فيهم تيزانات متاع حلبة (روائح عليلة في الانتظار)، خروب… لاحظت زيادة في كمية الحليب لكن موش في النوعية بالطبع
الحقيقة الخامسة : قد ما تحط صغيرك على صدرك الصدر « يحن »
صحيح!!
الدليل : قد ما كنت نجبد على قد ما صدري كان يعطي المرة إلي بعدها. ننصحكم ما تخافوش و ما تقولوش ما عنديش حليب قد ما توسع بالك من اللول و قد ما تحط صغيرك على صدرك قد ما ربي يبارك. الصدر يتبع القاعدة متاع العرض و الطلب!
في اللخر كلامي موش قاعدة علمية أكيدة لكن كتبتو من منطلق تجربة كان نجم ننصح بنصيحة : أعطيو الثقة في رواحكم و أسمعو قلب و غريزة الأم فيكم و أصنعو فكرتكم و تجربتكم برواحكم و تمتعو بكل لحظة مع صغيركم و ردو بالكم تكون لحظة عذاب.
و الأكيد إنو يلزمك تحافظ على ماكلة متوازنة تنفعك و تنفع صغيرك و تحميك من نقائص تنجم تضرك على مدى قريب أو بعيد!
يتربى (تتربى) في عزك و دلالك إن شاء الله!!
Version française: Allaitement et alimentation: le vrai du faux!
