طفل ضحية عنف جنسي: شنو تعمل حسب القانون التونسي؟

كي يحكي طفل على تحرّش ولا اعتداء جنسي، طريقة تصرّف الولي تنجّم تحميه… أو تكسّره أكثر.

القانون التونسي واضح: الطفل محمي، وكلامه يتاخذ بجدّية.

حسب القانون التونسي:الطفل لا يُطالَب بالإثبات.القانون هو الذي يتحرّك لحمايته.

• الطفل محمي بنصّ القانون،

• كلامه يُعتبر مؤشّراً قانونياً على وجود خطر،

• ويُلزم السلط بالتدخّل والتحقيق.

1. كيفاش نتصرفوا مع الطفل؟

• نسمعوه بهدوء

• نصدّقوه

• نقولولو:« إنت ما عندك حتى ذنب »

• نطمّنوه:« أحسنت التصرف كي حكيت »

•  ما نهوّنش
•  ما نشكّكوش
•  ما نسكّتوش

النص القانوني

« تؤخذ مصلحة الطفل الفضلى بعين الاعتبار في جميع الإجراءات التي تهمّه. » مجلة حماية الطفل.

2. أوّل خطوة قانونية: مركز الشرطة

حسب القانون:
نمشيوا لمركز الشرطة
 وخاصة خلية العنف ضد المرأة والطفل

القانون عدد 58 لسنة 2017

« لكل ضحية عنف الحق في التبليغ واللجوء إلى السلط المختصة. » مجلة حماية الطفل.

شنوّة هي خلية العنف ضد المرأة والطفل؟

خلية العنف ضد المرأة والطفل هي وحدة متخصّصة موجودة داخل بعض مراكز الأمن في تونس (شرطة أو حرس وطني). دورها استقبال شكاوى العنف المسلّطة على النساء والأطفال، وخاصة العنف الجنسي. هي بيرو موجود في المركز, و كان المركز الي مشيتلو ما فيهش, يوجهوك لأقرب واحد. 
الخلية تتعامل مع الضحية في إطار يحترم الكرامة والخصوصية، وتحرّر محاضر قانونية، وتوجّه للفحص الطبي عند اللزوم، وتُعلم النيابة العمومية.
في قضايا الأطفال، تُعتبر الخلية جهة أساسية لأنها تتعامل مع الطفل كضحية محمية بالقانون، وتُنسّق مع مندوب حماية الطفولة، وفق ما تنصّ عليه مجلة حماية الطفل والقانون عدد 58 لسنة 2017.

شكون ينجم يمشي للخلية؟

• أي شخص يعرف اللي صار ( الأم أو الأب ,قريب، معلّم، جار…).  القانون يسمح بالتبليغ حتى كان الولي متردّد أو خائف.
• مجلة حماية الطفل تقول « يمكن لكل شخص علم بوجود طفل في وضعية خطر أن يُعلم السلط المختصة. »

وين تلقاها؟

خلية العنف ضد المرأة والطفل موجودة في برشة مراكز شرطة, برشة مراكز حرس وطني

تنجم تسأل مباشرة في المركز:« نحب نمشي لخلية العنف ضد المرأة والطفل ». ولو ما كانتش موجودة في نفس المركز:لازمهم يوجّهوك للجهة المختصّة أو يقبلوا الشكوى ويكمّلوا الإجراءات القانونية

4. الطفل ما يرضاش قانونياً

في القانون التونسي:الطفل ما ينجمش يوافق على علاقة جنسية
 أي اعتداء هو جريمة

مبدأ قانوني جزائي « لا يُعتدّ برضا القاصر في الجرائم الجنسية. »

5.ثاني وجهة  الفحص الطبي

بعد التبليغ:

• الشرطة تعطي إحالة طبية

• الطفل يتفحص في مستشفى عمومي

الشهادة الطبية هي دليل قانوني حتى كان الحادثة قديمة

6. مندوب حماية الطفولة

المندوب يتدخّل فوراً و يحمي الطفل قانونياً

مجلة حماية الطفل « يعتبر الطفل في خطر إذا تعرّض لضرر جسدي أو نفسي. »

7. ما فماش “حلّ ودي”

❌ ما فماش تفاهم
❌ ما فماش تستّر
❌ ما فماش “نحلّوها بيناتنا”

القضية تعتبر قضية دولة و  موش قضية سمعة

القوانين

🔹 المبدأ العام – حماية الطفل

الفصل 3 تُراعى المصلحة الفضلى للطفل في جميع القرارات والإجراءات التي تتعلّق به.
الفصل 20  يُعتبر في وضعية خطر كل طفل يتعرّض لتهديد يمسّ سلامته الجسدية أو النفسية أو الأخلاقية.

🔹 واجب الإعلام (التبليغ)

الفصل 23يمكن لكل شخص علم بوجود طفل في وضعية خطر أن يُعلم السلط المختصة.

🔹 حق التبليغ والحماية

  القانون الأساسي عدد 58 لسنة 2017

لكل ضحية عنف الحق في التبليغ واللجوء إلى السلطات المختصة والحماية من كل أشكال العنف.

🔹 الرضا غير معترف به

 المبدأ الجزائي المتعلّق بالأطفال

لا يُعتدّ برضا القاصر في الجرائم الجنسية.