كيفاش تعطّر دارك للعيد بطريقة خفيفة ومريحة للضيوف

العيد هو الوقت اللي تولّي فيه الدار قلب اللّمة
جو مرحّب وريحة بنينة يخلّيو الضيوف يرتاحوا من أوّل ما يدخلوا. وما يلزمش تعبّي الدار بريحة قويّة برشا، شوية حركات صغار يكفيو باش تفوّح دارك بطريقة خفيفة ومريحة.

البخور: كيفاش تحضّرو وتبخّرو بطريقة ذكية

باش البخور يعطي ريحة باهية وتدوم، التحضير مهم برشا.
ما تحطّوش البخور مباشرة على الفحم وهو سخون برشا. استنّى شوية حتى تتكوّن طبقة خفيفة رماديّة، هكّا السخانة تنقص والزيوت المعطّرة تخرج بشويّة، موش تتحرق .

اختيار المبخرة زادة يفرق:

• المبخرة الكهربائية تعطيك تحكّم أدق في السخانة

• المبخرة التقليدية تنجح زادة، المهم تراقب الحرارة

باش الريحة تتوزّع في الدار:

• هوّي الدار قبل ما تشعل البخور

• وقتها سكّر الشبابك شوية باش الريحة تشد

• بعد 15 لـ20 دقيقة، حلّ شوية باش ما تولّيش الريحة قوية برشا

• حطّ المبخرة في بلاصة وسط الدار، بعيد على التيّارات القويّة، باش الانتشار يكون متوازن.

نصائح تزيد تطوّل مفعول البخور:

• اختار بخور فيه زيوت طبيعية كيما الصندل ولا العنبر

• خزّن البخور في علبة مسكّرة، بعيد على الضوء والرطوبة

• زيد البخور شوية بشوية، موش مرّة وحدة

تعطير القماش والمفروشات

باش ريحة دارك تكون خفيفة ومريحة، ما يلزمش ترش في الهواء.
ركّز على القماش: رشّ parfum d’ambiance خفيف على الستور والمخدّات يكفي، هكّا الريحة تقعد ثابتة وما تولّيش مزعجة.

بالنسبة للحوايج و الأغطية:
تنجم تزيد قطرات من معطّر الغسيل (parfum de linge) في الماكينة، يخرج الحوايج بريحة بنينة و خفيفة.

تنظيف بريحةطبيعية

حتى التنظيف ينجم يكون معطّر :
زيدقطرات من زيت اللافندر مع شوية خل أبيض و الماء ونظّف بيهم الأسطح الخشبية و الكوجينة.
النتيجة دار نظيفة، فريش، وريحتها طبيعية بلا ريحة كيميائية قوية.

كيفاش تعمل جو مرحّب في الدار

ما تنساش التهوية:
حلّ الشبابك شوية قبل ما يجيّو الضيوف باش الهواء يتبدّل.

النباتات زادة تعطي لمسة بنينة:
كيما الياسمين والفل  و حتى النعناع و العطرشية، ريحتهم طبيعية وخفيفة.

كمّل الجو بـ:

• ضو دافي

• شمع لزينة

• ورود

هكّا كل واحد يدخل يحس روحو مرحّب بيه من أوّل لحظة.

حيلة ذكية

ما تعملش ريحة وحدة قويّة في الدار الكل.
قسّم الريحة حسب البلايص:

• الصالة : أعملو رشّة خفيفة على الريدو و المخدّات , البيوت كيفكيف ، مع ريحة اللانج النظيف

• تنجمو تزيدو شمعة خفيفة و لا diffuseur

• البخور للكلوار و الكوجينة (بعد الأكل)

هكّا الجو يكون متوازن ومريح وما يقلّقش الضيوف.