كيفاش تنجح في تربية صغيرك و إنت ولي وحدك

العائلة التقليدية تبدلت. ما عادش تلقى كان عائلة متكونة من أب و أم. توا فما برشا عائلات متكونين من أم فقط ولا أب فقط يربيو في صغارهم وحدهم. الأسباب تختلف: طلاق، موت، سفر… نعطيوكم نصائح ينجمو يعاونوكم بش تربي ولادك و إنت ولي وحدك

الولي الغائب ينجم يكون حاضر. كان الأب يخدم في بلاد أخرى ينجم مثلاً يقري ولادو، يلعب معاهم، يتعشى معاهم… توا بسكايب و مسنجر حتى حاجة ماهي مستحيلة. الوجود هذا مهم للصغار و يساعد برشا الولي إلي قاعد معاهم ديما

كان الطرف الأخر ماينجمش يكون موجود ولا ميحبش، مش لازم تعمل دراما. تخطى الموضوع و عمل على روحك

أول حاجة: النظام. الحياة تكون مختلفة جداً كان إنت تكون منظم. حاول ديما أعرف كفاه نهارك بش يتعدى، تعرف شنوا بش توكل صغارك جمعة كاملة، تعرف شنوا ناقصك و شنوا لازم تشري… لازم تستانس تقوم بكري و ترقد بكري. تقوم قبل الصغار بش تحضرلهم الفطور و اللمجة و إلي يستحقوه لكل. ترقد بكري بش تنجم تعيش بالنظام هذا كل نهار و تحافض على صحتك

ثاني حاجة: خزانة المونة. أخيب حاجة تنجم تصيرلك هي كيف تجي بش تعمل بيبرو للبيبي و تلقى الحليب حكك وفي ولا تجي بش تبدل كوش و ما تلقاش ولا تجي بش تصمت مقرونة في الليل و تلقاها وفات ولا يجيك ولدك الصباح و هو ماشي يقرا يقلك ماعنديش ستيلو… في الأوقات هذم، بيت المونة تساعدك برشا. ما تنساش إلي إنت ولي وحدك و وقتك ثمين برشا ما بين الخدمة و الدار و الشريان و الصغار. الأسهل انك تقرى حساب الحاجات إلي تنجم تكون غير متوقعة

ثالث حاجة: المسؤلية. كيف تبدى ولي وحدك لازم تعلم صغارك المسؤلية. الصغير تنجم تعلموا يغسل الماعون، يحط و يلم الطاولة، ينظم فرشو، يطوي حوايجو… ما تتسماش سوء معاملة، تتسمى مسؤلية. كيف تعلم المسؤلية للصغير في سن مبكرة تعاونك برشا في سلوكو وقت المراهقة

رابع حاجة: تقليل من شأن الموقف متع العائلة متاعكم. كان الولي الأخر متوفي، في بلاد أخرى ولا إختار إنو يكون مش موجود في الصورة، مش لازم تلعب دور الضحية قدام صغارك و تحسسهم إلي هوما مساكن و يسخفو. ديما تعايش مع الموقف متاعكم كأنو عادي و كيف الناس الكل. الدراما هذيكا تنجم تأثر عليه و على شخصيتو

خامس حاجة: العمل. الأمهات إلي يقررو يبطلو الخدمة على خاطر ولدها صغير و هي تربي في صغارها وحدها مش فكرة باهية. العمل مهم ليك إنت و لنفسيتك، يعطيك إحساس بالأمان حتى كان ماتربحش برشا، المهم يعاونك. ما تعملش على نفقة ولا شهرية التقاعد متع المرحوم. العمل مهم حتى لصغارك كيف يكبرو و يشوفو أمهم تقدس العمل يتعلمو إلي هي حاجة مهمة

سادس حاجة: الإستناد. ما تخممش إلي وقت تطلب من عبد من العائلة ولا الأصدقاء إنو يعاونك معناها إنت فشلت ولا مكش قدر انك تقوم بالمهمة وحدك. كان تلقى شكون يشدلك صغيرك ولا يهزو و يجيبو من المكتب… ما ترفضش. أي وقت فارغ تنجم تربحو تعمل فيه حاجة أخرى

سابع حاجة: مهم انك تكون عندك حياة إجتماعية. انك تكون ولي وحدك مش حاجة ساهلة. هذا ما يمنعش إلي إنت لازمك تاخذ وقت لروحك. كيف الولي يبدا شايخ و عامل، الصغار زادا يكبرو عاملين جو

ثامن حاجة: إحترام الأخر. حتى كان الانفصال ماكانش باهي و انك مضرور من الطرف الأخر، عمرك ما تحكي بالخايب على الأخر قدام الصغار. هذي غلطة مخلفاتها ينجمو يكونو كبار على الصغير. الحاجات هذم ينجمو يخلفو الكره، الحقد و النقمة عند الصغير

تاسع حاجة: التربية. في أكثر الحالات وقت إلي ولي يربي صغار وحدو يدلل أكثر من اللازم و يبرر هذا بالموقف إلي عايشين فيه. قواعد التربية و الإحترام لازم يكونو نفسهم. مش لازم تغرقو بدلال و الهدايات بش تملئ الفراغ. بالعكس، الإفراط في الدلال يخلف قلت التربية و عدم الإحترام

أهم حاجة انك ما تحاولش تعوض الأخر. كانك أم راك ماتنجمش تكون أب و كانك أب ماتنجمش تكون أم. لازمك تكون مقتنع بالشيء هذا و توصل المعلومة هذي للصغار و تفهمهم

مقالات أخرى

نصائح ساهلة باش نقصوا من الاستهلاك الزائد في الدار