كيفاش نصرفو أقل كي نقضيو؟
الناس الكل تتشكى من المصروف و الدنيا شعلت فيها النار. إلي لابس عليه و إلي مش لابس عليه، لكل عايشين في أزمة. هذي النصائح إلي لازم تحطوها في مخاخكم و تحولوا تطبقوها بشوية بشوية
أول حاجة: كيف بش تشريو غلة ولا خضرة، حاولوا لوجو على أفار باهي من عند إلي يبيعوا من المنتج إلى المستهلك. أسوامهم أرخص. فما نقطة بيع من المنتج إلى المستهلك بحذا وزارة الفلاحة. فما برشا نقاط في مناطق أخرى
ثاني حاجة: إلي ما في حالوش ينجم يمشي يشري في أخر نهارات متع المرشي بش يلقى لخضرة أرخص ولا يشري خضرة بدات تولي طايبة بسوم أقل. و الخضارا مذبيهم كان الخضرة إلي بدات تطيب ولا المضروبة يحوطها في كرذونة بش المستحق ينجم يهزها و يستعملها
ثالث حاجة: النقاط إلي تلموهم كيف تقذيو من مركز تجاري و المجلات إلي فيهم التخفيضات ينجمو يصلحولكم بش تنقصوا من المصروف كيف تمشيو بش تشريو. ساعات فما تخفيضات ما تنجم تتمتع بيهم كان كيف تبدى عندك كارطة. ديما أعملوها بش تربحو نقاط ولا تتمتعوا بتخفيضات. كيف تقضي امشي ديما وحدك، خاصة الأمهات إلي عندهم صغيرات بش يفهموا رواحهم و ما يقولولهمش إشريلي
رابع حاجة: وقت تلقاو فرصة باهية و تخفيض كبير متفلتوش. كان تلقاو تخفيض كبير مثلاً في مواد غسلان الحوايج اغتنموا الفرصة خاطرو إستثمار باهي و ينقصلكم في المصروف
خامس حاجة: قبل ما تمشيو بش تشريو اعملوا ليستا متع الحاجات إلي ناقصين و إلي حاجتكم بيهم بش كيف تمشيو تشريو كان إلي موجود في الورقة كهو و ما تشريوش الزايد. ما تهزوش فلوس بزايد، ما تهزوش كارطة ولا شاك بش تحصرو رواحكم
سادس حاجة: كان تعرفوا رواحكم تضعفوا و متنجموش تتحكمو في المصروف أوقات الصولد ولا في راس العام تجنبوا المراكز التجارية إلي تنجم تلزكم للمصروف
مقالات أخرى
