نصائح باش انقصوا على رواحنا تعب الكوجينة في رمضان
رمضان يجي و المرأة تجيها الغصرة. تلقى روحها من الكوجينة للخدمة و من الخدمة للكوجينة، مع الدار و الصغار. و ليوم بش نقولولكم كيفاش تعملو بش نصرفو أقل و نتعبو أقل في الكوجينة و كيفاش نبذرو أقل
أحسن حاجة كان تحضروا قائمة متع الحاجات إلي بش طيبوهم في شهر رمضان لكل. تعبيو كل نهار بشربة و الطبق الرئيسي و حلو السهرية. أقراو حساب النهارات إلي بش تاكلوا الفاضل. كيف تعمل القائمة هذي تولي تعرف شنوا لازمك تقضي، متشريش الزايد و تربح الوقت. الحاجة لخرى الباهية إلي تبدى متأكدة إلي حتى شي ما يطيش
تنجموا زادا تنقصوا على رواحكم قبل و تحضروا حاجات كيما الجلبانة، الثوم، السبناخ، المعدنوس، الحشو متع البريك… تنجموا زادا تحضروا اللحم تقسوه طروف. طاجين ملصوقة تنجموا تحضروه لكل يقعد كان ناقص طياب، نهارت إلي حاجتكم بيه تخرجوه، تستناو حتى يذوب و بعد تدخلوه في الكوشة. البريك صوابع حتى هو تنجمو تحضروه، تخبيوه في حكة و تحطوها في الثلج. المرق الكل تنجموا تخليوهم في الثلج: مرقة جلبانة، مرقة لوبية، صلصة المقرونة و العجة بلاش عظم. نهار إلي عند برشا ضغط تخرج من ثلج
كيف تقعدلك ماكلة فضلة في رمضان، ما طيشوا حتى شي. الماكلة الزايدة يا تحولها إلى حاجة أخرى يا تخبيها في حكة و تحطها في الفريجيدار. فما ناس ما يحبوش ياكلوا البايت. نسيهم فيها و عاود إجبدها بعد مديدة
بش ما تعديوش برشا وقت في الكوجينة لازم تركزوا. كيف تدخلوا للكوجينة بش طيبو نحيو التليفون خاطر بش تعديو الوقت تتفرجوا في الفيدو و طالعين هابطين في الفايسبوك ولا تحكيو في تاليفون. في عوض تعديو 30 دق في الكوجينة تلقاو رواحكم عديتو ساعتين. كان الراجل مش بش يعاون في الكوجينة، اطلبوا منو يتلهى بالصغار بش إنت تنجم تركز
الماعون: أكثر حاجة تتراكم في رمضان هي الماعون. بعد ما تكمل طيب تلقى جبل يستنى فيها. بش نتفاداو لحكاية هذي، الطنجرة إلي نكملو منها نغسلوها بالوقت و نعاودو نستعملوها بش ما يتراكمش. مش لازم نخرجو الماعون لكل و بعد نقعدو واحلين فيه
كل حاجة تخرجوها لازم بالوقت ترجعوها لبلاصتها. حكك الإفاحات ترجعوهوم كيف تكملوا بيهم، خرجت الجبن من الفريجيدار ترجعوا بالوقت. هكا نتفاداو الخوضة في الكوجينة. كيف يبدى كل شي في بلاصتو حتى بعد العشاء ما تبداش مفجوعة من الكوجينة
حاولوا فرغوا الكوجينة على قد ما تقدرو بش تنجموا تدوروا و تحركوا على راحتكم. ماكينة القهوة إلي مش تستعملو فيها خبيوها و الماكينات لخرين إلي ما تستحقوهمش خبيوهم. خليو بلاصة فارغة، أسهل حتى في اللمان
مسألة التبذير: حاولوا طيبو على قدكم بش ما طيش حتى شي. مثلاً المقرونة، 120 غ للكهل الواحد تكفي. الماكلة إلي تقعد تنجموا تعطيوها للصغار يفطروا بيها. الماكلة إلي تقعد عمرها ما تطيش. اللحم إلي يفضل تنجموا تحطوه في الشربة ولا في الطاجين. الخبز إلي يقعد تنجموا تعملوا بيه سلاطة بلانكيت، تنجموا تعملوا بيه شبلير ولا بشمات ولا حاجة حلوة
كيفاش تتعب أقل كيف عندك ضياف
كيف يجيك ضيف في رمضان، تلقى روحك مغصورة بش تحضر العشاء. ما كملت السهرية إلى ما تلقى روحك تعبت. تنجم تستقبل عباد في دارك و إنت مرتاحة
تنجم تحضر حاجات قبل : سلاطة مشوية، صوص الشربة، حشو البريك، بريك دنوني ناقص كان الطياب، التارت، صوص المقرونة، صوص الكسكسي. تنجم زادا تحضر الطاولة و الماعون من قبل
مقالات أخرى
