كيف يجيك ضيف على غفلة شنوا لازم يكون عندك ريزرف في الدار؟

احنا في ثقافتنا و في عاداتنا كيف يجينا ضيف حتى كان على غفلة لازم نفرحو بيه و نودوه بحاجة

شنوا الحاجات إلي لازم يكونوا موجودين في الدار؟

أول حاجة لازم تكون عندك في الكوجينة هي التاي. ساهل وفيسع يحضر. متنساوش بش تخبيو السكر و نعناع الشايح

القهوة العربي زادة حاجة تنجح بنينة وفيسع تحضر

كن الضيف متاعك مايشربش القهوة و التاي، تنجم تخبي دبوزة متع ليموناضة في الثلاجة وبعد تزيدها الماء. ولا تخبي عصير بكوات تجبدو وقت يجيك شكون

متنساوش بش تخبيو شوية فاكية لوز، كاكاوية، بندق. أي حاجة تنجم تقدمها مع التاي ولا في صحفة

ننصحكم زادا تخبيو حلو عربي في حكك بلاستيك ولا بلار. تنجم وا زادا تحوطهم في الثلاجة بش يقعد أكثر كيما الكعك ورقة إلي كيف تخرجو من الثلج تلقاه كيف أول نهار شريتو

في الثلج نخبيو حكة متع قلاص. نجمو نقدمو القلاص فوقو فاكية مهروشة ولا بسكويت

تخبي زادا حكة ولا زوز متع تن تنجم تعمل بيهم حاجات مالحة تقدمها للضيوفك

خبيو شيبس و قازوز في حالة ما يبدى فما صغار

بش تربح الوقت و ما تخليش روحك مغصورة في اخر وقت، تنجم تحضر فون دو تارت ولا تشري بركات تخبيهم. تخبي زادا جبن مرحي في الثلاجة. كيف يجيك ضيف تنجم تحضر تارت مالحة فيسع

و كان عندك ميكرو اوند، تنجم تعمل كايك في فنجان قهوة في أقل من 3 دقائق. ما لازمكم كان: 40 غ شكلاطة، 40 غ زبدة، 30 غ سكر، 20 غ فرينة و 1 عضم. تحركهم مليح في الكأس إلي بش تقدم فيه و تحطو في ميكرو اوند لمدة 1 دقيقة ولا 1 دقيقة ونص

الكايك إلي حضرتو تنجم تقدمو مع الغلاص. حاجة بنينة، فيسع تحضر و تفرح الضيف متاعك

فما برشا روساتات متع غاطو و حاجات مالحين تنجمو تلقاهم على انترنات تعملوهم بالحاجات إلي عندكم في الدار

أفكار ساهلين تنجمو تحضروهم فيسع بش تفرح بضيوفك