نصائح ساهلة باش نقصوا من الاستهلاك الزائد في الدار

ديما المواطن يلوم في الدولة و البلدية على مشكلة النفايات إلي موجودة في برشا بلايص في تونس. أما علاش حتى حد ما تسائل شنوا مسؤلية متاعو و شنوا ينجم يعمل بش ينقص من الإستهلاك الزايد

السلوك هذا هو إلي يعمل الفرق بين بلاد متقدمة و بلاد لا. هاذم حاجات تنجموا تعملوهم بش تنقصوا من الاستهلاك الزايد

الفكرة الأولى: ماعادش تستعملو ولا نحاولو نقصوا من المواد أحادية الاستعمال و إلي يمكن التخلص منها كيف الكيسان البلاستيكية ولا إلي بالكرذونة و المنادل إلي يطيشو… لازم زادا تنقصوا من إستعمال الشكاير البلاستيكية كيف تمشيو تشريو. هزوا قفة ولا شكارا قماش. تنقص من التلوث و التبذير

الفكرة الثانية: كيف تمشيو بش تقضيو إفاحات ولا فاكية ولا عدس ولا قطانية ولا أي حاجة تنجم تحطها في حكة، هزوا الحكك متاعكم معاكم يعبيوهملكم غادي. هكاكا تنقص على روحك تعب و تنقص من إستعمال البلاستيك

الفكرة الثالثة: عوضوا الدبابز الماء البلاستيك بالبلار هكاكا تنقصوا من تلويح البلاستيك. مش ساهلة الحكاية هذي خاطر ما تلقاش دبابز الماء البلار في البلايص الكل. أما فما شركات يبيعوهم و يوصلو حتى إلى باب الدار. الفايدة في الاجتهاد

الفكرة الرابعة: فرز النفايات. حاجة موجودة عندها برشا في البلدان المتقدمة. حاولوا تقسموا النفايات متاعكم. المواد الغذائية وحدها، البلاستيك و المواد القابلة للرسكلة وحدها، و الباقي وحدو. المواد القابلة للرسكلة ينجمو يهزوهم الناس إلي تلم و تستقات من الشيء هذا ولا فما شركات زادا تجي و تهزهم من عندك. تنجموا تستعملو المواد الغذائية كيف كومبوست أو سماد بش تغذي التراب. كان عندك جنينة في دارك ولا أرض فلاحية ولا حتى في الجنينة متع الإقامة إلي تسكن فيها، تعمل حفرة في التراب و تحط فيها النفايات المتكونة من المواد الغذائية و تغطيها بالتراب. هكاكا تكون نقصت من النفايات إلي بش طيشها في الشارع و غذيت الأرض في نفس الوقت

أهم حاجة إلي حتى شيء ما يطيش. إلي إنت ما يصلحلكش ينجم يفيد غيرك

مقالات أخرى

كيفاش تعمل بش الراجل يولي يشارك معاك في شؤون العائلة ؟