شنوا الحاجات إلي ما لازمش تقولهم لل المرأة مازالت كيف ولدت
تعب، هرمونات، حاجات تبدلت في الحياة، إكتئاب… بعد الولادة المرأة تلقى روحها غاطسة في برشا أحاسيس و تغييرات إلي هي بيدها ما تفهمهمش. مش ديما ساهل بش تعيش بالتغيرات هاذم لكل
المرأة تحط حياتها الاجتماعية، العملية و أنوثتها على جنب بش تتلهى بصغيرها 24 ساعة على 24 و 7 أيام في الجمعة. ما ترقدش مليح، بدنها ما عادش تعقلو و لازمها تتعلم برشا حاجات فيسع و في وقت قصير
بعد الولادة المرأة تبدى شادا في شعرة. ماهيش ناقصة تعليقات و ملاحظات من عند أقاربها و راجلها
هاذم الحاجات إلي مالازمش تقولهم المرأة مازالت كي ولدت
“ماكش الأولى إلي تولد في الدنيا”
المرأة تبدى في حالة و سي السيد يكمل عليها و يقارنها بنساء اخرين. أكثر حاجة تنجم تخرجها من عقلها. و شنوا قولك سيدي خويا كان هي زادا تقارنك برجال اخرين؟
“هاك نهار كامل في الدار، مافهمتش علاش تاعبة”
أيا طلع علاه ديما تاعبة ! بالك خاطر لازمها تتلهى بصغير نهار كامل حتى كيف يرقد لازمها تعس عليه. لازمها زادا تتعامل مع هرموناتها
ما ننساوش عادا إلي هي ليلة كاملة تعديها فايقة بش ترضع و تبدل كوش و ترقد. و عندها زادا عشاء رجالها بش طيبو و الدار بش تلمها. فهمتوا توا علاه المرأة ديما تاعبة
“إنتي قوم انا نخدم غدوا الصباح”
المرأة زادا تخدم نهار كامل ماغير ما تاخو راحة ولا وقت لروحها. معناها المرأة تعدي أكثر وقت و هي “تخدم” في الصغير و الدار و الرجل. ميسالش كان تخليها ترقد وتعاونها. مرا تقوم إنت مرا تقوم هي. ماتنساش إلي صغيرك إنت زادا
“تلهى بروحك شوية”
هي تعدي نهارها لاهيا بصغيرها و تبدل في الكوش و ترضع و طيب و تنظف و ماعندهاش لحظة بش ترتاح ولا تاخو وقت لروحها و هو يقولها لازم تتلهى بروحك. المرأة يعلم بها ربي كيفاش تحس في روحها. مش لازم تكمل عليها بملاحظات خايبة
“شبيها الدار مش منظمة؟”
شنوااا؟؟؟ كان مرتك ما خملتش الدار معناها راهي مانجمتش ولا ما لقاتش الوقت. مش لازم تبدى تعلق. و كان إنت ياسر متقلق، شمر على ذريعاتك و خفف عليها الحمل و فرحها
شعندك تعمل غير تتلهي بالصغير؟
انك تتلهى بصغير مازال كي تولد ماهيش حاجة ساهلة. خاصتاً كان أول بيبي. لازم ترضعو، و تبدل الكوش و ترقدو وتعس عليه و تتلهى بدبشو. هذا لكل و هي تتعامل مع بدنها الجديد و هرموناتها إلي طالعين هابطين. ما ننساوش زادا البيبي لكبير إلي كي يروح يحب يلقى دار نظيفة و عشاء طايب
“مانجمش نشدو، تاعب”
انك تتلهى بالببي متاعك مش مزية. ماتنساش إلي وقت إلي إنت لبرا في الخدمة تحكي مع عباد و تاخو في وقت ترتاح وتعمل قهوة و تمشي تفطر. المرأة تعدي نهار كامل محصورة في الدار، تتلهى بالببي و الدار. معناها مافيها باس كان تشدو شوية بش هي تنجم تاخو وقت لروحها
محتوى متعلق
