عدي الصلاعة في تونس: إكتشف الجنوب التونسي
تخمو تعديو الصلاعة في تونس؟ أحمد الفرشيشي يعطيكم يبرتاجي معاكم تجربتو و يعطيكم النصائح اللازمة
ليوم بش نرجع شوية نحكي على السفر والسياحة الداخلية، مع إقتراب عطلة الشتاء نتصور فيكم برشة كيفنا يحضرو برنامج للشمال الغربي، و إلا الجنوب التونسي ألي احنا مغرومين بيه برشة و نمشيولو تقريباً على القليلة مرة كل عامين نحوسو في جزء منو. ليوم بش نحكيلكم عليه ونعطيكم للناس ألي كيفنا ألي مذابيهم ينظمو رحلتهم على كيفهم وحدهم ويمشيو عند اهلنا في الجنوب المعروفين بكرمهم وطيبتهم و في وسطهم ما تحسش روحك غريب
تونس – قابس
– من ألي تعملت الطريق السيارة الجديدة، ولينا فيسع نوصلو من تونس في تقريب 4 سوايع، كل ساعتين نرتحو على بعضنا مرتي و أنا ، وكل مرة واحد فينا يسوق. الحاجة الأولى ألي لازمكم تشوفوها هي المتحف الحربي في مارث، ألي يشخص وحدة من أكبر المعارك الحاسمة في الحرب العالمية الثانية و ألي بدلت المنعرج للحلفاء، و ألي كان فيها ثعلب الصحراء رومل هارب من مصر
من مارث تنجم تمشيو تزورو
– قرية توجان، ألي هي قرية بربرية جبلية مزيانة برشة و تباتو عند صديقنا بشير حسناوي في الجبل في البيوت الكهفية كي جدودنا
– قرية زمرتن عند سي علي بوهالة Dar Zmerten ألي هزنا للمتحف البربري في القرية ومعاه عملنا رحلة في المنطقة حلوة برشة في كاف النسورة ألي كلها أثار من الحرب العالمية الثانية و تنجمو تشوفو جزيرة جربة من قمة الجبل
صور أحمد الفرشيشي
قرية تمزرت
– تنجموا تزورو المتحف الأمازيغي عند سي منجي بوراس و تنجمو تباتو و إلا تفطرو في
مطماطة – مدنين
– في ثنيتكم لمدنين بش تتعداو على مطماطة فما برشة عائلات مازالت تسكن في بيوت كهفية و تنجموا تزوروهم وتشربو بحذاهم كأس شاي وفما شكون فيهم يبيت عندو الزوار
– قصر حلوف، أنا بتنا في دار ضيافة اسمها دار سناء في وسط واحة و من غادي على ساقينا زرنا قصر حلوف
صور أحمد الفرشيشي
توزر – تمغزة
– في الثنية تنجمو تعملو تصاور في وحدة من استراحات شط الجريد
– مدينة و واحة تزور غنية عن التعريف ؛تنجمو تزورو فيها المدينة العتيقة، دار شريط، عنق الجمال، مكان تصوير ستار وورز أما احنا للأسف حسيناها أصبحت مدينة سياحية أكثر من اللازم و فقدت شوية من الأصالة متاعها و لقينها معبية برشة بالسياح ولينا اخترنا نكملو حتى لتمغزة، فيها أقل زوار و وبتنا عند خونا منير وين موجود الشلال
– تمغزة؛ عملنا فيها تحويسة في كانيونس حتى لين وصلنا لميداس ، وتعدينا على مناظر خلابة وين صورو فيلم لو بسيون انقلي . ومن غادي زادة تنجم تزور الشبيكة، مذبيك بكري مع التسعة متع الصباح قبل ما تتعبا بالكيران متع الوداديات و الرحلات المنظمة
صور أحمد الفرشيشي
دوز – قبلي
– بالنسبة للي يحبو يباتو في الصحراء في دوز، احنا مشينا مع خونا علي بن زايد بعيد على الضوضاء السياحية متع السبعينات، متع الطبال و الزكرة، احنا نحبو الرياض،ماشين نستمتعو بهدوء الصحراء، خبز الملة، لحم في القلة و طبيعة وكهو.
– في قبلي، تنجمو تمشيو لقصر غيلان عند خونا رضا أما سايسو رواحكم في الطريق، صحيح هو طريق معبد وباهي، أما بعامل الريح ساعات تتكون كثبان في وسط الكياس و كان الواحد يجري برشة ينجم لا قدر تتقلب بيه الكرهبة. وفي قصر غيلان تنجمو تخيمو تعومو في العين السخونة، تعملو كواد، إلخ، أما الأحسن تمشيولها خارج الموسم السياحي كانكم كيفنا ما تحبوش الزحمة.
صور أحمد الفرشيشي
تطاوين – غمراسن
في تطاوين بتنا في كوخ دويرات بحذا خونا رؤوف و من غادي زرنا قرية شنيني و زيتونة العكاريت ألي عمرها فوق ال900 سنة و زادة القصور، قصر أولاد سلطان، قصر أولاد دباب، إلخ
في غمراسن، مع جمعية صيانة التراث بغمراسن ، زرنا بعض المواقع للعصور ما قبل التاريخ وين شفنا الحفريات و رسومات في الكهوف و حتى أثار أقدام الديناصورات.
– وفما زادة قرية قرماسة، لازم تزوروها
– و في الطريق مروحين بش نباتو في توجان و إلا تمزرط، عملنا دورة للصمار زرنا سطح القمر
صور أحمد الفرشيشي
النصائح قبل ما تمشيو
– لازم تهبط الخريطة غوغل مابس خارج التغطية من في خاطر برشة بلايص في الثنية .
– الجري برشة مش باهي خاصة في طرق ما تعرفوهمش، و ردوا بالكم في بلايص عادي يقصو عليكم جمال و تعرضكم كثبة في الطرق ألي قراب للصحراء.
– كونوا كرماء مع اهلنا في الجنوب خاطرهم بش يحطكوم فوق ريوسهوم و يعاملوكم بطيبة و إحسان ما عندكمش فكرة قداش.
– ديما صبوا إسونس للكرهبة في أول كيوسك يعرضكم خاطر بش تعملوا مئات الكيلومترات في الخلاءالمخلي، نفس الشيء للماكلة
– في النهار عادي تدور بنص يد، و في الليل لازمك لبسة خشينة، قشابية، ، إلخ. تنجمو تلقاو برشة حاجات أخرى على الموقع متاع أحمد الفرشيشي
