شنيا الحاجات لينرفزو لمرا و راجل مايفيقش بيهم
.
وقت الراجل يسأل مرتو ولا صاحبتو ويقولها شبيك و هي تجاوبو شي راهو فما حاجة مقلقتها. الرجال يعملوا ساعات حاجات تنجم تقلق المرأة و بش ميقولش عليها خرنانة تسكت على روحها و تولي كي الكأس يتعبى بشوية بشوية حتى يخلط للفم. يجي وقتها الراجل و يبدا يسأل شبيك شبيك عبارة على كأس مليان للفم و هو يرج فيه. تولي المرأة تفيض
الحاجات إلي ينرفزو المرأة و ما يفيقش بيهم الرجال؟
أشغال الرعاية غير مدفوعة الأجر: المرأة تعمل حاجات تابعين الدار و الصغار أكثر ببارشا من الراجل
مرقدتش ليلة كاملة خاطر ولدي مريض و قمت في الصباح تاعبة و هو يغزرلي و يقلي شبيك. نحب نقلو تاعبة خاطر مرقدتش ليلة كاملة و انا لاهية بولدنا وحدي” –سلوى
أنا نعدي الويكند نقضي في الدار و نطيب ونغسل الحوايج و نتلهى بالدار نخلط اخر النهار تاعبة عالأخر تولي أي حاجة يعملها تنرفزني” –مروى
نقول لراجلي كيف طيب حط المغرفة في صحن بش متمسخش الدكانة و هو يحطها طول على دكانة. كان نتكلم يولي يتغشش خاطر هو في مخو يعاون فيا و في الحقيقة قاعد يساهم. نولي نسكت و نقول شي أما أنا متغشة”-أماني
كيف الراجل يوعد بحاجة و في لاخر ما يعملهاش: مش المهم تكون حاجة كبيرة. مثلاً كيف الراجل يوعد مرتو إلي هو بش يتلهي بالصغار بش هي ترتاح و بعد تلقاه قدام التلفزة و شادد تليفونو و ما تلهاش بالصغار. تتنرفز خاطر فيبلها بش تاخو وقت لروحها و تمشي تتلهي بيهم هي و كيف يسألها شبيك تقولو شي بش تتفادى أنها تترشق
وعدني في عيد الأمهات بش نخرجو و نخرجو الصغار و قالي ماتعمل حتى شيء و هو بش يتلهى بكل شيء. صباح راقد عدة حضرت فطور الصباح و فطرت الصغار و انا نغسل في الماعون جا باسني و قالي هاني ماشي للقهوة عادا انا ترهوجت قالي شبيك قتلو شي” –مهاء
تنجم تكون المرأة منرفزا في جرت الهورمونات: النساء عنا العادة الشهرية ولا مشكل هرمونات إلي يخلونا ساعات ماناش قد بعضنا. لازم الراجل يتفهم إلي ماهيش حاجة بيدنا ساعات خارجة عن السيطرة. تفرعيسة متع الهورمونات زيدها التعب متع الدار، المرأة تولي مش في صحنها
اللامبالاة: المرأة تتنرفز كي يبدا الراجل ما يهمو في شي و ما يعطيش قيمة للحاجات
نهارت عيد ميلادي راجلي ما جابليش كادو و ماقاليش عيد ميلاد سعيد. ما فكرش حتى بش يقول لبنتي إلي هو عيد ميلادي ولازمها تجي تقلي عيد ميلاد سعيد” –عايدة
المرأة تهز في عبء ذهني و جسدي كبير. الراجل لازم يساهم في أعمال الدار بش يخفف عليها
