كيفاش تلهي الصغيرات في الدار
الصغيرات كي يقعدو في الدار يفدو ,و يفدو برشا زادة . هاك علاش حبينا نعاونوكم بشوية أفكار تلهيوهم و يملاو بيهم وقتهم.
ورشة طبخ
تختارو حاجة ساهلة و بسيطة تحظروها انتوما و الصغيرات
كانكم مبتدئين تنجمو تعملو روسات هاذي متاع البسكوي هذا و إلا كيما لميس تحظرو بيتزا.
المهم و الأهم هو الجو آلي باش تعملوه للصغيرات طبلية متاع تطيب مزيانة و ماعون بلستيك خاطرو أخف و ما يتكسرش هكة تظمنو إلي كل شي يتعدا على خير
بالطبع للصغيرات يلزمكم تبعدو على كل حاجة تطيب بالنار تفاديا للحوادث
تنكر و لعب الأدوار
الصغيرات يشيييخو على التنكر و لعب الأدوار. يلزمكم تشريو برشا لبسات متاع تنكر من هوني تنجمو تلقاو برشا اختيارات
تنجمو زادة تتسلفو من عند الأصحاب الي عندهم صغيرات كيفكم
كان ما فيها وين تنجمو تدورو على دبش قديم و تبدلو فيه شوية و الا تشدو في لبسة وحدة
مثلا في التصويرة الصغرونة ما عندها كان اللبسة الفوقانية متاع بياض الثلج ياخي لبست معاها :
مريول كبير أحمر فيعوض الجوب
سروال أزرق و صباط فضي يلمع متاع أميرات آلي يقلك
مع تاج أزرق
الحكاية لازمها بيروك أصفر (شعر مستعار) تاج بالورق و شوية مكياج و خرجت أحلى أمورة
رسم و تلوين
للرسم و التلوين حاجتكم بشوية أقلام زينة و فوتر و أوراق حتى كراسة قديمة تنجم تقوم بالواجب حاجة يحبوها الصغيرات تنجمو تبداو حتى مع البيبيات إلي عمرهم 10 شهور لكن انتوما معاهم بالتأكيد و فما أقلام مصنوعة خصيصة ليدياتهم الصغار
و تنحمو حتى تطبعولهم برشا تصيورات تلقاوهم في مواقع مخصصة
الدهن و التلوين بالألوان المائية
التلوين بالڨواش مشكلته يمسخ ننصحوكم باش تحطو غطاء بلاستيك و برشا جرايد قدم على القاعة و البلايصة المحيط و شوف و شوف هههه
لبسوهم طبلية باش ما يمسخوش دبشهم و خلبهم يتفرهدو
تنجمو تلصفقو ورقة كبيرة على الحيط
تستعملو كراذن قدم في وين محطوطين الأوراق
و آلا فوق الطاولة أما ما تنساوش الغطاء و الجرايد
ملاحظة مهمة كان عندكم أوراق مطبوعة ما عادش تستحقوهم و الظهر متاعهم أبيض تنجمو تستعملوهم زادة في عوض الأوراق البيض
أما لجو كبير و تفرهيدة هايلة تعطيوهم يلونو بيديهم طووول
البيبي ملي عمره 10 ينجم يبدا يدهن طول بإيديه يلزمكم تكونو حاضرين و تحظرو البانو مباشرة بعد التبلبيزة
تنجمو تلقاو الألوان المائية إلي تستعمل بالإيدين في أبراكادابرا أما نتصورو إنها تتباع في بلايص أخرى
تنجمو زادة تحلو الألوان المائية العادية بشوية ماء أماما تنساوش إلي ماهم مجعولين للصغيرات إلي يحطو إيديهم في الفم
نصيحة : ،حلو الألوان المائية بماء بالصابون خاطر هكاكة تنظاف أسهل مبعد
تحية كبيرة لهالأم إلي عملت مكان مخصص للفن
اليوڨا
كان عندكم الصبرفهموهم انتوما شنوة يلزمهم يعملو ماكنش تنجمو تلوجو في اليوتيوب تلقاو بااارشا فيديوات مهمين
ننصحوكم تقراو الأرتيكل هذا على اليوڨا للأطفال مع تصاور و فيديوات
فما زادة في القناة پيوي برنامج لليوڨا للأطفال
الصلصال
الصغيرات يشيييييخو على اللعب بالصلصال و يزيدو يعملو جو كي يبدا فما فورمات و قوالب يلعبو بيهم
كان ما عندكمش تنجمو تعطيوهم أدوات الطبخ و الحلويات رغملي في معظم الحالات العكس هو إلي يصير هههه
الأحسن انكم تعطيوهم يلعبو بعجينة السكر و الا تصنعو الصلصال متاعكم
المهم ما تنساوش تحميو البلاصة إلي يلعبو فيها خاطراي نوع يلصق و يبلبز الدنيا
الليڨو
قد ماكم باش تشريو ليڨو هوماباش يشيخو و يفرحو و ما يعياوش و ما يفدوش
للصغيرات برشا اتفاداو القطاعات الصغار برشا و ما تنساوش تشجعوهم و تفرحو كي يصنعو حاجة ما تشبه لشي
قراية القصص
حاجة هايلة و جو كبييير حاولو تفضيو رواحكم سويعة باش تحكيوولهم حكاية كان عندكم صغير واحد و الا زوز صغيرات تنجمو زادة توريوهم التصاور و تحكيو
أقراو برنة و نغمة و انزلو على كلمات و بالطبع مش لازم عليكم تتقيدو بالحكاية كلمة كلمة تنجمو انتوما تتخيلو من عندكم و تبدلو الحكاية و الشخصيات حسب العمر و الحاجة
هاذي ليستة قصص هايلة اختاروها امهات
