حاجات نعملوهم كل يوم بش نقصوا من إستعمال الماء
من الإهتمامات المشتركة في العالم: الماء قاعد ينقص بصفة كبيرة و هذا يشكل خطر
في تونس ، يبلغ الاستهلاك اليومي من المياه 120 لترًا للفرد ، والتي لا تزال باهظة بسبب حالة الإجهاد المائي التي تجد البلاد نفسها فيها ، حسب منعم الشواشي ، رئيس إدارة الإنتاج الإقليمي – شركة استغلال وتوزيع المياه
الماء مورد ثمين. لازم للإنسان و كل الكائنات الحية. هذا علاش لازم نستانسو بحاجات نعملوهم كل يوم بش نقصوا من إستعمال الماء
منخليوش الماء يجري في الفارغ
كيف تبدى تغسل في وجهك، تحك في سنيك، تغسل في الماعون… متخليوش الماء يجري في الفارغ. ديما سكرو وقت إلي مكش تستعمل فيه
كيف تبدى تغسل في الماعون، عبي بانو صغير تشلل فيه
أعمل دوش في عوض البانو
كيف تعملوا دوش تستعملو 70 لتر ماء. في نفس الوقت البانو يستهلك بين 150 و 250 لتر
الصغار تنجموا تدوشولهم مع بعضهم. يعملوا برشا جو. و حتى الأزواج ينجمو يعملوا دوش مع بعضهم في إطار الحب و الاقتصاد في الماء
اختار “شاس” مزدوج الدفع
في بالكم إلي وقت نجبدو ساش متع المرحاض نستهلكو بين 9 و 12 لتر ماء في كل مرة؟
الساش مزدوج الدفع هي إقتصادية و صديقة للبيئة على خاطرها تخليك تنقص في كمية الماء إلي بش تستعملها إلي هي ما بين 3 و 5 لتر
إستعمل الماء الزايد
وقت إلي تغسلوا ولا تشللو الخضرة متاعكم، تفكروا حطوا بانو الحوض بش تخليو الماء إلي يهبط. تنجمو تستعملوه بش تسقيو النباتات. نفس الشي للماء إلي تصمتوا فيها البطاطا و المقرونة. ما تلوحوهاش. هي غنية بالنشاء و برشا عناصر طبيعية تفيد النباتات
ما تخليوش الماء يجري في الفارغ وقت تستناو في الماء بش يسخن. حطوا سطل تحت السبالة بش تخلي الماء. تنجم تستحقوا في مسحان الدار ولا تسقيو النباتات
تصليح تسريبات متع الماء
تسرب متع الماء حاجة ياسر خطيرة. في بالكم إلي كيف سبالة الماء تقعد تقطر نخسرو 4 لتر ماء في الساعة و إلي شاس كيف تقعد تقطر نخسرو 25 لتر في الساعة؟
بش تعرف كان عندك تسرب في الدار، شوف عداد الماء في الليل قبل النوم، و ما تستعملش الماء، و تعاود تشوف في الصباح قبل ما تستعمل الماء. لازم الأعداد يكونوا هوما بيدهم. كان تبدلوا معناها فما تسرب
ساعات لازم تبدل حاجة صغيرة بش تصلح التسرب. متنساوش إلي التسرب يطلع في سوم الفاتورة. و كان الحالة تستحق مختص، اصرف توا بش ترتاح من المصروف بعد
إستعمل ماكينة غسلان الماعون و الحوايج كان كيف تتعبى
كيف تستعمل ماكينة غسلان الماعون تستهلك أقل ماء من كيف تغسل الماعون بال يد. الماكينة تستهلك 10 لتر و الطريقة التقليدية تستهلك 40 لتر
هذاك علاش ما تخدم الماكينة، متع الماعون ولا الحوايج، إلا وقت إلي تتعبى على الأخر
إستعمل ماء الأمطار
ماء الأمطار تنجم تعاون برشا بش نقتصدو في الماء متع الشراب. نجمو نستعملوها للفلاحة، للقضية في الدار، للجنينة، المرحاض، غسلان الكرهبة
نجمو نحطو ستيرنا فوق السطح، في الجنينة و إلا في الأرض الفلاحية و تستعمل ماء المطر في عوض الماء الحلو
مقالات أخرى
