وصية كل أم لصغيرها

وصيتي للي نحبهم… و ما أعزش من صغاري لقلبي

كان نهار خفت من الموت… راهو خاتر خفت عليكم… ما تخافش عليا  يا قلبي

نحبك تعيش بالحب..
. حب روحك و قدّر روحك و عز روحك…

انا موش بش نخلي حاجة كبيرة… كان الاحساس الي انا نحبك و فخورة بيك…

ما تبعدش على خواتك… على الناس الي يحبوك بالحق ليك.

اما كان مشيت انشالله تتلها بيك مرا تحبك كيما حبيتك …
مرا كبرت و عاشت معايا.  و تنجم تحكيلها على كل شئ و تبدا كيفك

كان الي دايرين بيك ما فهموكش   يجي نهار و تكبر و تعمل جناحات.  واتطير و تعيش كيما تحب على كيف كيفك

نوصّيك ما تدمن على شئ.. ما تخليش روحك رهينة حد ولا شي…
خلاف الكتب و الفن

نوصّيك عيش حياتك و أضحك للدنيا

أقرأ و تعلّم و موش مهم تجي في المرتبة الأولى…المهم انك تعرف تخمم و تنافش تاخو قرار…
و تخدم خدمة تعجبك

موش مهم تعرس ولا لا…
موش مهم  تحيب صغار ولا لا. 
موش مهم تسكن في الملك ولا في الكراء..
الي في قلبك هو الأهمّ

أما كون حنينة على خواتك و ولادك… و بيهم اهتمّ

عمل على روحك… و اخدم… ما تستنا من حد بش يعطيك حريتك… و حقك..  فكو
كون نجمة ضوّاية تقول كلمتك و تحقق حلمتك

الأرض أرضك و البلاد بلادك… و انا هنا ولاّ غادي ديما الأم 
…
كان خانوك و لا ضلموك ميسالش ابكي و عاود قوم… مادام فما الحياة الأمل موجود و يلزمك تاقف على سقيك و تقوم.
كان الوضع موش عاجبك…. حاول كيف لينا تغيرو
كان عرضك انسان مضلوم..  حاول تعاونو و ما تستنا من حد بش يردلك الجميل…

فخر ليك انك تعمل الخير و نهار آخر ترقد ضميرك مرتاح…

ادفني فين انت تحسّ بالراحة
… أما كي نبدأ بحذا الي حبيتهم باه ليك و لولادك خاتر الاحساس بالانتماء مهم
كان قالو الخايب شيهمك…خلي يقولو اش يهم
. أما انت تقرر … كان تحب تفرح و تغني ولا تسكت و تبكي.
أنك لاباس هو الأهمّ
متخليش عوايد الناس تحكم عليك بالحزن و الهمّ
   أنا ماذابيا كان كل ما تتفكرني تزها و تضحك…
   
تحب تجي توصلني لبلاصتي ما تسمع حد. أعمل شنو تحب٣

البكاء موش ضعف… و الضحك و الفرحة ليست خيانة للذكري
و تفكّر تحب تلبس الأحمر و تفرح و تضحك… ما يهمكش،انا ديما فخري هو قلبك
.

نوصّيك.. ما تلبسش غطاء الحزن.. ميسالش كان غنيتو  و صفقتو و فرحتو… و جيتو… المهم حبو بعضكم و ما تتضروش غيركم
نحبك ديما كيما تقول العناية قامتك منتصبة، هامتك مرفوعة… وانت تقدم ما توخرش

انشالله نمشي قبلك… و كي نمشي نخليك كبيرة… و ما نخليك يتيمة

سعدي سعد سعدي سعد
بنتي خير من ألف ولد
ما نعطيها لحتى حد
عيش بنتي الباهية
… ما نعطيها لكاهية