ليستة الرجال إلي ماهمش متاع عرس

وقتلي يعجبنا راجل نوليو في حالة تبهيم و نشوفو فيه الأمير الشهم على الحصان الأبيض و نبداو عاد نحلمو و نألفو و نختارو في بوكي الورد متاع نهار الصالة و هو في الحقيقة ماهوش أمير و حتى بهيم ما عندوش

و بما إنا نعرفو إلي ميزة التمييز بين الحصان و البهيم تولي على قدها في حالة التمعشيق قلنا نربحو فيكم ثواب.. خذينا نصائح الرجال و بيناتنا كان عرضكم واحد من هالليسة أدناه سنفرو /بحياتكم :

يقلك مازلت مانيش فاهم روحي و مانيش متهيأ لعلاقة دائمة. كان وصل قالها راهو مقتنع بيها فوق ملي تتخيل ما غير ما تحاول أنسىااا ما عندك وين توصل و هذا بقطع النظر إنت قداش محلاك و تهبل.. الشي خارج عن نطاقك

معرس لكن موش متفاهم مع مرته. حزين رزين و يسخف أما يقلك ولادي مازالو صغار صعيب نخمم في الطلاق قبل ما نتهنى على ولاد ولادهم… أهرب ساقيك أعلى من راسك!! من اللخر يحب يعدي بيك الوقت و يلقى حل لتعاسته على ظهرك أما مستحيل يكون ليك خاطر أصلا ما عينوش في الطلاق و يتحجج بالصغار. أقصى حاجة تنجم تكونها عشيقة حتى يلقى البديل

ما يتذكرك كان في حكاية آخر دقيقة و يلزمك تكون حاضرة و مستعدة زادة ما عندكش حياة خاطر قاعدة مركونة تستنى في سيادته. هوني زادة سيب عليك و اهرب خاطر بالنسبة ليه إنت عمرك ماك باش تكون في المرتبة الأولى

يقعد مديدة خانس لا يجاوب على تليفوناتك و لا على ميساجاتك يرقد يرقد و يجيك بعد جميعتين يقلك الله غالب كنت مخنووق بالخدمة.. لا تفيق بيه وقت يدخل في سبات و لا وقتاش يستفيق.. السيد هذا يا إما معرس يا إما عنده شك صحيبات كل مرة يتلهى بوحدة منهم. بالنسبة ليه انت لعبة بين اللعب

حسب الرجال إلي عطاونا هالمعلومات، الراجل كي يبدا حاشته بيك  يكون موجود بالحق! و يثبت وجوده بشتة الطرق و يفرضه و يلوج باش يشوفك. يخطط معاك و يحسب حسابك في حياته و يبرمج و انت معاه في البرامج متاعه و كي يبدا مخنوووق يكلمك باش يستسمحك و يفسرلك ظروفه و يلقى الوقت باش يكلمك حتى للحظة. إذا كان ما عملش هذا الكل راهو ما حاجتوش بيك ما غير ما تكذب على روحك و تلقالو الأعذار و كون متأكدة إنك تستحق خير منو ألف مرة!