كي تولي النساء عندها نفس الحقوق الاقتصادية للرجال
.
هندة شنّاوي
دعم النساء يلزم يكون في الوقت هذا و المرحلة الحاليّة مبني على الدعم الاقتصادي.
النساء اليوم في تونس عندهم إستعداد و عندهم حاجيّات مستعجلة بش ينهضو بأنفسهنّ
إقتصاديّا.
مشروع منظمّة أوكسفام و شركائها في تونس مبني على دعم النساء الحرفيّات بش يطوّرو في المنتوجات متاعهم و يكونو عندهم إستقلاليّة في الإنتاج و يروّجو المنتوج متاعهم على أوسع نطاق، و هذه مبادرة جيّدة جدّا. و قدت نظّمت أوكسفام تظاهرة اكتشفنا فيها 15 حرفيّة من تونس الجمهورية، انتفعو بمساعدة المنظّمة و شركائها، و قدّمو منتجاتهم للبيع. التضاهرة كانت ناجحة، رغم الصعوبات. في قلب الزهرة، في بلاصة شعبية ، في حيّ من أقدم الأحياء ، يتلمّو فيها نساء من الجنوب، من الساحل و من الشمال لعرض بضاعة تونسيّة، مصنوعة من أيادي نساء حرفيّات.، و هذه حاجة مزيانة برشة.
المنتوجات كانت متنوّعة، و كلّها بجودة عالية جدّا.. و هذا المهمّ، أن يتمّ تثمين اليد الحرفيّة النسائيّة في تونس. اليوم النساء في تونس يصنعو و يصنّعو في برش حاجات: العولة، زيت زيتونة، أفّاحات، عسل، ماء ورد و عطرشيّة، تقطير الأعشاب بأنواعها الكلّ، الربّ، المعجون، البسيسة،… يبتكرون زادة في الصناعات التقليديّة في الزعف، الحلفة، المرڨوم و ماتابعو،…. في كلّ المناطق في تونس، النساء بخلاف أنّهم هوما اليد العاملة الفلاحيّة الأساسيّة، و بخلاف أنّهم يخدمو في المصانع و المعامل ، تلقا النساء قاعدين يصنّعو في ديارهم في مواد عندها قيمة تراثية، ثقافيّة و غذائيّة و صحيّة. العمل مع المجتمع المدني و المحلي، كيما أوكسفام تونس، بش يساعد على انتعاش الدورة الاقتصاديّة و بش يشارك و يدعم حقوق النساء، خاتر إستقلاليّة النساء، و أنّهم يتمتّعو بحقوقهم الاقتصاديّة و السياسيّة و خاصّة الاجتماعيّة لن يمرّ إلاّ باستقلاليتهن الاقتصادية. و في هذا السياق، المبادرة هذه متاع أوكسفام تونس مهمّة جدّا و ناجحة و عمل المجتمع المدني المحلي لازمو يساعد علي دعم الدورة الاقتصادية المحلية الي هو بدوره باش يدعم حقوق النساء
