كيفاش تداويو الإسهال
أنا من طبعي مصارني ياسر حساسة من هوا تتهوى دوب ما ناكل حاجة البرا و إلا ماكلة مزيتة شوية كرشي تعمل فيا و توريهملي ألوان ألوان : وجايع، غرض ردان و خاصة جوف تجري حاشكم!!
و ما غير ما نقولولكم إلي الدخول و الخروج على التوالات موش حلو.. موش حلو بالكل و خاصة كي تبدا موش في دارك، عاد قلت وين بيها يلزمني نلقى حل و حل جذري زادة موش نص لباس و ما يكونش غالي ( على حساب كرشي يلزم حاجة رخيصة ماكنش فلوسي باش نصرفهم عليها) و لقيتو الحل.. الحل ليموناضة سخونة ايه نعم!
هاو كيفاش :
خوذ قارصة كبيرة و إلا زوز قارصات صغار
أعصرها
زيد للعصير زوز مغارف صغار عسل و إلا كان ما عندكمش شوية سكر
سخنو الخليط في الميكرو اوند يلزم يكون دافي موش يحرق
أشربو بالشفاء ( إي نقللكم على ما ياتي بالك تقعدو تغزرولو الكاس ههه)
المهم إنو في بضع ساعات كل شي يرجع لاباس ما عادش وجيعة ما عادش غرض ردان و خاصة ما عادش جريان جوف كلمة مني و على مسهوليتي
