ريتوهم ساقيا؟
.
ريتوهم ساقيا؟
هذا الجانب الي قليل وين يحكيو فيه النساء الحبالة والي يتعب ويندب ويندم. هاذم سيقاني المنفوخة عندهم توة شهرين علي الأقل. الدورة الدموية متاع النساء وقت الحبالة تتأثر بضغط الجنين علي البدن وهذا يخلي برشة ماء يعبي العروق متاع الساقين لين يتنفخو والنتيجة تولي الأم تمشي كي البطة ولكن بسرعة سلحفاة مكرزة من العالم. النتيجة كذلك برشة وجيعة كل ما نخرج باش نمشي (ولازمك كي تبدا حبلة تمشي باش تسهل الولادة وباش البيبي يقعد في صحة جيدة…) ووجيعة زادة كل ما ناقف … تي حتي دقيقتين وقوف نحس ساقي باش ترخ بيا والتسطير يولي قوي لين ساعات نولي نبكي (موش مبالغة).
هذه وحدة من المشاكل والتعب الجسدي وقت الحبالة. فما برشة مشاكل اخري وتعب نفسي وجسدي كبير …
انشالله يجي نهار ونحكي عليه كيما فمة نساء اخرين بداو يتشجعو ويحكيو. علاش نحكيو؟ علي خاطر الأمومة قعدت من أول الدنيا حاجة مقدسة لا يتحكي فيها ولا نخوضو في تفاصيلها. تعيشها المرا وحدها وتدفع ضريبتها وحدها وكأنها خيار ذاتي فقط ما عنده حتي بعد اجتماعي وسياسي. وفي نفس الوقت يتدخل المجتمع في تفاصيل أخري كمثلا تحديد علاقة الام بالجنين واختيارات الام في طريقة الانجاب والرضاعة وغيرها… #pregnancy
