شنوة يلزمنا ناكلو في السحور؟

باش نحافظو على صحتنا و باش نلقاو رواحنا في فورمة في نهار رمضان (خاصة إلي رمضان السنا كيما الأعوام إلي فاتو سخون ) و باش ما نعطشوش من الأحسن و من المفروض إنا نسبقو بعض الماكلات في سحورنا و نبتعدو على ماكلات أخرين.

بعض المواد الغذائية إلي يلزمنا نفضلوهم على غيرهم :

المواد الغنية بالبوتاسيوم ( هو معدن يحافظ على كلاوينا و يعاون على الصبر على العطش)  و نلقاوه في :

البنان -الموز

الدقلة
المشماش
البطاطا ,طاببة في الفور مثلا
اللوبيا البيضة
العدس
الياغورت الطبيعي ما غير سكر بالطبيعة..

المواد الغنية بالمانيزيوم باش نحافظو على كيفنا و كيف غيرنا و نقصو شوية من حشيشة رمضان و باش نحافظو زادة على عضلاتنا و هو موجود خاصة في :

اللوبيا البيضا
الشكلاطة … هذا العلم آش يقول
اللوز، الزوزة، البندق… الفاكية عامة…
السبناخ المغلي و إلا الطايب بالبخار

و حاشتنا زادة بالبروتيينات إلي يمثلو الساس إلي يبني الخلايا، مختلف الأعضاء و زادة المواد الحياتية كيما الأنزيمات و الهورمونات… و نلقاوه بالأخص :

في مختلف اللحوم الحمرا و البيضا و في أبيض العظمة
نجمو زادة نلقاوه في الحبوب القمح مثلا
الحليب و مشتقاته
العدس

فما روسات بنينة و نافعة برسا نلقاو فيها المواد هاذي الكل و أكثر

الزميط و إلا بسيسة الشعيرة هي زادة ماكلة بنينة مغذية و تصبر على العطش