تحب على ماكلة صحية غنية و بنينة و نافعة؟ الروسات هاذي ليك

CF: metro.ca

تعمل في ريجيم، رياضي، باش تصيم تلوج شنوة تحب توكل صغيرك؟؟ تحب على ماكلة صحية غنية و بنينة و نافعة؟ الروسات هاذي ليك

الماكلة هاذي تمثل فطور صباح متاكمل و سحور يخليك تصبر في نهار الصيام على الجوع و العطش!

الماكلة هاذي اسمها crème budwig

باش تحظروها حاشتكم ب:

4 مغارف كبار جبن أبيض منزوع الدسم و إلا تنجم تستعملو الياغورت الطبيعي بلاش سكر

2 مغارف زيت نباتي (اطباء الأغذية يحبذو زيت الكتان كان لقيتوه في تونس بربي قولولي عليه!!) أنا الحق نستعمل زيت اللوز، زيت الزوزة…

عصير نص قارصة

بنانة مغفصة و إلا زوز مغارف صغار عسل

زوز مغارف صغار فاكية (لوز، زوزة، بوفربوة…) أو حبوب من نوع زريعة الكتان و الجلجلان… نيين بالطبيعة و مريحيين

زوز مغارف صغار حبوب كيما الڨصيبة و الشعير و الروز كامل… نيين حتى هوما و مرحيين. أنا نستعمل الڨصيبة إلي نلقاها في المغازات

غلة

طريقة التحضير :

مالليل نفخو الڨصيبة في الماء باش تطرى ماكنش تنجو تاكلوها مقرمشة

اركضو الياغورت و إلا الجبن الأبيض مع الزيت بالباهي لين الزيت ما عادش يظهر

خلطو المواد الكل و صحة بالشفاء

آهو علاش الكربمة هاذي غنية بارشا و نافعة :

الزيوت النباتية المذكورة أعلاه غنية بالأوميڨا 3 و مهمة برشا للخلايا و المناعة

عصير القارص : فيه بااارشا أنواع من الفيتامينات و أملاح معدنية و يعاون على تسوية الحموضة فب البدن رغملي هو حامض في الأصل يطيح ضغط الدم و ينضف المصارن…

الفاكية و الحبوب الأخرى : غنيين بالبروتيين و الفيتامين ب و المعادن

البنانة غنية بالبوتاسيوم ( يعاونا على الصبر على العطش كيما وارد في النشرية هذي) و المانيزيوم و الحديد

العسل (يعوض البنان) غني بالفيتامينات معادن… هو و البنان نستعملوهم باش نحليو الكريمة و ما نستعملوش السكر

الغلة قيمة ثابتة أكيد

من المفروض إنو هالمواد هاذي الكل تتخلط نية و تتاكل نية

ما تحاولوش تتفلسفو و حافظو على الكميات المذكورة أعلاه و إلا تحطو زوز أنواع متاع فاكبة مثلا

الروسات هاذي هي نصيحة أطباء الأغذية

What's Your Reaction?
Excited
0
Happy
0
In Love
0
Not Sure
0
Silly
0
View Comments (0)

Leave a Reply

Your email address will not be published.

© 2019 BINETNA. All Rights Reserved.

Scroll To Top